父親節呈獻︰新福利父女檔車長

2020年6月21日

唔知大家有無聽過新福利有一對父女檔車長?

囡囡慧欣任職車長已近一年,平時揸開9號小巴線,能駕馭任何大小車型嘅佢透露,自細就好鍾意車,讀書時坐過爸爸駕駛嘅28C,「覺得爸爸好勁好有型,好崇拜佢」,於是畢業後就喺爸爸嘅鼓勵下投身車長。

明哥則喺5年前加入新福利做車長,平時主要揸26A同102X。以前每日收工,都會同慧欣分享返工趣事,久而久之,令慧欣都對車長一行充滿興趣。後來得知慧欣想一齊加入新福利當車長,明哥欣喜若狂。喺慧欣第一次返工出車時,明哥更專誠跟車陪伴左右,為慧欣打氣。

慧欣表示,當車長後同爸爸話題也變多,幾乎全都是圍繞返工,爸爸亦會成日傳授心得,例如自己遇到邊啲較難嘅街口、彎位,回家都會提醒慧欣。有時一個早更一個夜更,兩人亦會用memo紙寫低說話溝通,互相關心。

問到父親節明哥有咩願望,見明哥一臉滿足,話囡囡請食飯已很開心,而呢個願望原來喺訪問嘅前一日經已實現;慧欣就表示,父親節有一句說話想同爸爸講︰「就係希望爸爸一直都身體健康」。

新福利喺呢度都祝願各位爸爸今日父親節健康快樂!如果各位乘客搭車時有幸遇到呢對父女檔車長,記得同佢地打聲招呼喔!