【婦女節呈獻】新福利首位女車長

2021年3月 8日

「車長」傳統一直被認為係男性主導嘅職業,但隨住時代改變,越黎越多女性加入成為車長。適逢三八婦女節,今日就為大家介紹一位傑出女車長,佢今年入行已踏入第20年,更榮獲新福利「車長微笑運動」嘅最高分車長,佢係黃文瑛車長,瑛姐。

講起第一名,瑛姐當年都係加入新福利嘅第一名女車長。佢話細個時見過有女司機駕駛軍車,非常佩服,長大後覺得車長工作形象正面,而且收入穩定,所以決定入行。起初培訓時由於身形細小,要操作一輛巴士的確有難度;所幸培訓導師跟其他車長都好幫佢,讓佢能慢慢熟習。

問到擔任女車長有何特別?佢坦言初時唔少人會覺得女車長開車特別慢,亦會質疑其技術,但瑛姐相信只要堅守原則,做好自己就可,要虛心接受別人意見,但同時唔好過於在意,要對自己有信心。

瑛姐謂乘客就像朋友一樣,佢多年開車一直有個習慣,就係當乘客上車會同佢地打招呼,有啲乘客一聽到“早晨!”就認得係佢,久而久之即使夜晚開工時,有d乘客見到佢都會一樣叫“早晨!”,十分惹笑。瑛姐認為只要親切對待乘客,乘客自會以禮相待,而觀乎「車長微笑運動」收到嘅評價,大部份都稱讚瑛姐「有禮貌」、「友善」、「熱心」,難怪會成為得分最高嘅車長。

上班時係優秀嘅車長,下班後亦係一位盡責嘅母親。瑛姐家裡有3位小孩,雖然車長工作需要輪班,但瑛姐喺工餘時間就會盡力照顧、陪伴小孩成長,佢慶幸工作穩定,小孩都已慢慢長大。現在收工後亦會去游水放鬆吓,保持良好身體狀態迎接工作及家庭生活。

瑛姐最後亦鼓勵更多女性投身巴士車長,佢相信女車長有獨有嘅親和力,而且駕駛技術不錯,只要認真付出,一樣可服務廣大乘客。謹代表公司喺呢個屬於女性嘅日子,向瑛姐多年嘅辛勤付出講聲「多謝」!